BBC დიდი ბრიტანეთი
რუსეთის დაქირავებულთა დაჯგუფება „ვაგნერმა“ კონტროლი დაამყარა უკრაინის აღმოსავლეთ ნაწილში მდებარე ქალაქ სოლედარზე, თუმცა კიევი აცხადებს, რომ მისი მეომრები ბრძოლას აგრძელებენ.
რუსულმა საინფორმაციო საშუალებებმა გაავრცელეს განცხადება, რომელიც, მათი თქმით, „ვაგნერის“ ხელმძღვანელ – ევგენი პრიგოჟინს ეკუთვნის. ის ამბობს, რომ უკრაინელები ქალაქის ცენტრში ალყაში არიან მოქცეულნი.
უკრაინის თავდაცვის მინისტრის თანაშემწემ – ანა მალიარმა მანამდე განაცხადა, რომ „გრძელდება მძიმე ბრძოლები.“
მხარეთა განცხადებების გადამოწმება ვერ მოხერხდა
სამშაბათ საღამოს პრიგოჟინმა გამოაქვეყნა განცხადება: „დაჯგუფება „ვაგნერმა“ კონტროლი დააწესა სოლედარის მთელ ტერიტორიაზე. ქალაქის ცენტრში წარმოიქმნა „ქვაბი“ და იქ მიმდინარეობს ქუჩის ბრძოლები.“
განცხადებაში ხაზგასმულია, რომ სოლედარზე შტურმში მონაწილეობდნენ მხოლოდ „ვაგნერის“ მებრძოლები, რომლებიც არ ირიცხებიან რუსეთის შეიარაღებულ ძალებში.
მანამდე, რამდენიმე საათით ადრე, მალიარმა განაცხადა, რომ „მოწინააღმდეგე ყურადღებას არ აქცევს მძიმე დანაკარგებს პირად შემადგენლობაში და აგრძელებს აქტიურ შტურმს.“
„ჩვენი პოზიციების მისადგომები მოფენილია მტრის ცხედრებით. ჩვენი მეომრები შეუპოვრად იბრძვიან“, დასძინა მან.
სოლედარის დაცემა – ესაა მარილის მომპოვებელი პატარა ქალაქი – დაეხმარება რუს ჯარისკაცებს ალყა შემოარტყან ახლომდებარე სტრატეგიულ ქალაქ ბახმუტს.
სამშაბათს დიდმა ბრიტანეთმა განაცხადა, რომ რუსეთის არმია და დაქირავებულთა ჯგუფმა „ვაგნერი“ – „სავარაუდოდ“ აკონტროლებენ ქალაქს.
ორშაბათს უკრაინის პრეზიდენტმა – ვლადიმირ ზელენსკიმ, მაღალი შეფასება მისცა უკრაინელების შეუპოვრობას.
სოლედარის თემაზე ბევრს კამათობენ და მისი აღება მნიშვნელოვანია ორი მიზეზით.
პირველი: ეს შეაძლებინებს რუსეთის არმიას მიუახლოვდეს ქალაქ ბახმუტს. რუსეთის ხელში აღმოჩნდება ღრმა გვირაბებით დაქსელილი საბადოები, რომლებიც უმოქმედოა აპრილიდან მოყოლებული და მოსკოვი შეაღწევს უკრაინელების მიერ დღემდე კონტროლირებად ტერიტორიაზე.
მეორე: მოიერიშე ძალებს შეეძლებათ უკრაინელებს დაუპირისპირდნენ მათივე მეთოდით.
ერთ-ერთი მიზეზი, რამაც განაპირობა კიევის მიერ გარკვეული ტერიტორიების გათავისუფლება, ესაა მისი უნარი მიზანში ამოიღოს რუსეთის მომარაგების ხაზები. შეტევაზე გადასულ ათასობით რუს ჯარისკაცს, შორსმსროლელი რაკეტები აბრკოლებს, შეავსოს პირადი შემადგენლობა, საბრძოლო მასალების, საწვავის და საკვების მარაგები. ეს ასევე ხელს უშლის სამხედრო ტექნიკის გადაადგილებას.
სოლედარის დაკავება, რომლის მოსახლეობაც ომამდე 10 000 კაცს შეადგენდა, მოკვეთს ბახმუტს მომარაგების მთავარი ხაზიდან – ახლომდებარე სლავიანსკიდან.
დიდმა ბრიტანეთმა განაცხადა, რომ მისი მონაცემებით, სოლედარი ახლოა იმასთან, რომ რუსების ხელში გადავიდეს, თუმცა ლონდონმა იქვე დააამატა, რომ კრემლს გაუჭირდება ბახმუტის დაუფლება, რადგან აქ უკრაინელებს გააჩნიათ „თავდაცვის სტაბილური ხაზები“.
აშშ-ს თავდაცვის სამინისტროს ერთ-ერთმა მაღალი რანგის მოხელემ ორშაბათს განაცხადა, რომ რუსეთი აკონტროლებს სოლედარის „მნიშვნელოვან ნაწილს“.
საბრძოლო მოქმედებები ბახმუტის ირგვლივ, უკვე რამდენიმე თვეა გრძელდება და ამერიკელმა ჩინოვნიკმა ის დაახასიათა, როგორც „დაუნდობელი“.
ომის შემსწავლელი ინსტიტუტი, რომელიც აშშ-ში ბაზირებული ანალიტიკური ცენტრია, აცხადებს, რომ პრიგოჟინი განაგრძობს დაჯგუფება „ვაგნერის,“ როგორც რეალური, ისე გამოგონილი მიღწევების აფიშირებას იმგვარად, რომ „ვაგნერი“ წარმოჩნდეს ერთადერთ ძალად რუსეთში, რომელსაც შეუძლია ხელშესახები წარმატების მიღწევა უკრაინაში.
რუსეთმა რამდენიმე მარცხი იწვნია უკრაინაში მას შემდეგ, რაც ერთი წლის წინ უკრაინასი შეიჭრა. აქ იგულისხმება ერთადერთი რეგიონული ცენტრის დაკარგვაც ქვეყნის სამხრეთში, რომელიც კრემლს ოკუპირებული ჰქონდა.
სოლედარის ხელში ჩაგდება, მოსკოვის მიერ გასაღდება, როგორც პროპაგანდისტულ, ისე სამხედრო წარმატებად.
ეს მონაპოვარი არ იქნება განსაკუთრებული და მოსკოვს ის ძვირი უჯდება, მაგრამ ამ ქალაქის აღება იქნება არგუმენტი, რომელსაც ის ადგილობრივ კრიტიკოსებს შეაგებებს.