CNBC აშშ
ფრედერიკ კემპი
ეს უაღრესად მნიშვნელოვანია. ჩვენი დროის ორი წამყვანი ავტორიტარული ლიდერი აცხადებს უპრეცედენტო მიზანს, შეიძლება ითქვას, ფაქტობრივ ალიანსს – უსაფრთხოების უზრუნველყოფის სფეროში, რომლის ქვაკუთხედს წარმოადგენს ახალი მსოფლიო წესრიგის დამყარება, ნაცვლად იმ წესრიგისა, რომელიც შეიქმნა მეორე მსოფლიო ომის შემდეგ, შეერთებული შტატებისა და მისი პარტნიორების მიერ
ჩინეთის ლიდერმა სი ძინპინმა და რუსეთის პრეზიდენტმა ვლადიმირ პუტინმა, მოისურვეს დარწმუნებულიყვნენ იმაში, რომ მსოფლიოს ყურადღების მიღმა არ დარჩენილა მათი 38-ე პირადი შეხვედრა, რომელიც პარასკევს, 4 თებერვალს, გაიმართა პეკინში – ზამთრის ოლიმპიადის გახსნის ცერემონიამდე რამდენიმე საათით ადრე და იმ ვითარებაში, როცა 100 ათასი რუსი ჯარისკაცი ემუქრება უკრაინის სუვერენიტეტსა და დამოუკიდებლობას.
გასულ უქმეებზე, სიმ და პუტინმა გამოაქვეყნეს ამბიციური ერთობლივი განცხადება ინგლისურ ენაზე, რომელიც 5300 სიტყვისგან შედგება. განცხადებაში, მათ აქცენტი გააკეთეს „მსოფლიო ძალებს შორის ბალანსის გადანაწილების ტენდენციაზე“, ანუ ამ წონასწორობის – აშშ-დან, მისი დემოკრატიული პარტნიორებიდან და მოკავშირეებიდან, მათი ქვეყნების მიმართულებით გადანაცვლებაზე.
ამ განცხადებაში არის ბევრი ისეთი რამ, რაც მართლაც უნდა იქნას წაკითხული და გააზრებული. მე მხოლოდ რეზიუმეს გაგაცნობთ: რუსეთი და ჩინეთი ერთიანდებიან და ახდენენ იმ დონის თანამშრომლობის დემონსტრირებას, რომელიც აღემატება სტალინისა და მაოს პარტნიორობას. ეს გულისხმობს, რეგიონული და მთელი მსოფლიოს მასშტაბით, ორი ქვეყნის ძალისხმევის კოორდინაციას. პეკინმა პირველად დაუჭირა მხარი მოსკოვს, მისი ნატოს გაფართოების საწინააღმდეგო კანმპანიაში და გაიზიარა პუტინის მიერ ფორმირებული ევროპის უსაფრთხოების სტრუქტურა. თავის მხრივ, რუსეთი გამოვიდა უსაფრთხოების შესახებ შეთანხმების წინააღმდეგ, რომელიც დაიდო აშშ-ს, ავსტრალიასა და ბრიტანეთს შორის და მხარი დაუჭირა „ერთი ჩინეთის პოლიტიკას“, ასევე მიესალმა რუსეთი-ინდოეთი- ჩინეთის თანამშრომლობის ფორმატს და დაეთანხმა პეკინის ამბიციების მართებულობას არქტიკაში.
რუსეთი და ჩინეთი თავიანთ პარტნიორობას არ განიხილავენ ნატოს მსგავსი ფორმისა და შინაარსის ალიანსად, მაგრამ ღიად აცხადებენ საკუთარი ამბიციების შესახებ.