Iltalehti.fi ფინეთი
ლაური ნურმი
„ფინეთი ახდენს ქვეყნიდან რუსეთის საელჩოს 9 თანამშრომლის დეპორტაციას, რომლებიც ასრულებენ სადაზვერვო ამოცანებს. მათი ქმედება არღვევს ვენის შეთანხმებას დიპლომატიური ურთიერთობების შესახებ“ – ახმიანებს სახელმწიფო საბჭო გადაწყვეტილებას, რომელიც მიიღო საგარეო პოლიტიკისა და უსაფრთხოების საკითხთა სამთავრობო კომისიამ
დეპორტაციის გადაწყვეტილება ისტორიულია არაერთი თვალსაზრისით. უპირველესად ეს მოწმობს იმაზე, რომ ფინეთის უშიშროების პოლიციის – SUPO-ს კონტრდაზვერვა მუშაობს ხარისხიანად.
უშიშროების პოლიცია საქმეს რიგიანად მანამდეც უძღვებოდა. ათწლეულების განმავლობაში, ტეჰტაანკატუს ქუჩაზე მდებარე რუსეთის საელჩოში იმდენი მზვერავი მუშაობდა, რომ მათი ტრანსპორტირებისთვის საჭირო იქნებოდა მთელი ავტობუსი.
ფინეთის უშიშროების პოლიციამ – SUPO-მ მშვენივრად იცოდა რუსი დიპლომატებიდან, რომელი იყო ჯაშუში. მათ თვალყურს ადევნებდნენ და იმ შემთხვევაში, როცა მზვერავების საქმიანობა ზედმეტად აგრესიული ხდებოდა, მათ ქვეყანას ატოვებინებდნენ.
ასეთი ფაქტების შესახებ, საზოგადოებას იშვიათად ატყობინებდნენ, ვინაიდან ფინეთის ხელისუფლებას არ სურდა საჯარო დეპორტაციებით რუსების გაღიზიანება. ეს ხდებოდა მხოლოდ უკიდურეს შემთხვევაში. მთლიანობაში რუსულ დაზვერვას ხელ-ფეხი ხსნილი ჰქონდა, რადგან ეს იყო გარდაუვალი ბოროტება, რომელსაც ყველა უნდა შეჰგუებოდა.
რუსეთისა და ფინეთის ურთიერთობა უკეთესის სურვილს აჩენს, თუმცა ამაში დამნაშავე რუსეთია. არც ფინეთს და არც ფინელებს არაფერი ჩაუდენიათ საიმისო, რომ რუსეთს პროვოცირება მოეხდიანა. გადაწყვეტილება დიპლომატების დეპორტაციის შესახებ, სავარაუდოდ იმიტომ მიიღეს, რომ რუსები სულ უფრო ხშირად გადადიან მიჯნას, რომლის გადალახვაც დაუშვებელია.
რუსი მზვერავების ქვეყნიდან გაძევება, რუსებს გაურთულებს მაგალითად დივერსიების დაგეგმვას ფინეთში. შესაბამისად ეს აუცილებელი ნაბიჯია. იმავდროულად დეპორტაცია მიუთითებს იმაზე, რომ დემოკრატიული სახელმწიფო დაიღალა ისეთი მეზობლით, რომელიც სისტემატურად სჩადის სამხედრო დანაშაულობებს.
ფინელები მარტო დარღებოდნენ რთული მეზობლის წინაშე, ქვეყანა ნატოს სრულფასოვანი წევრი რომ არ გამხდარიყო.
ამ კვირაში Iltalehti აკვირდებოდა სწავლებას სახელწოდებით – Baltops. აშშ-ს საზღვაო ფეხოსნები ამუშავებდნენ დესანტის გადასხმის ოპერაციებს ბალტიის ზღვის სანაპიროზე. ასობით ამერიკელი საზღვაო ქვეითი და ბრიტანელი მედესანტე ვარჯიშობს ბალტიის ზღვაში აგრესორის განადგურებაზე.
ნატოს ეს საქმიანობა, ფინეთის ხელისუფლებისთვის დამატებითი არგუმენტია რუსი მზვერავების გასაძევებლად.
ფინელებს აღარ მოუწევთ მარტო გაუმკლავდნენ რუსეთის საპასუხო ზომებს. სწავლება Baltops-ის მასშტაბური სცენარი, ითვალისწინებს მტრული სახელმწიფოს შეჭრას პოლონეთის ჩრდილოეთ სანაპიროზე. ეს ღონისძიება მიუთითებს, რომ ნატო ემზადება რუსეთის მცდელობისთვის, რაც გულისხმობს სუვალის დერეფნის გადაჭრას. თუ რუსეთის შეიარაღებულმა ძალებმა ეს მოახერხეს, ისინი დაამყარებენ სახმელეთო კავშირს კალინინგრადთან. ასეთ ვითარებაში ფინეთის მნიშვნელობა ნატოსთვის, კიდევ უფრო გაიზრდება.