ფინელთა უმეტესობა არ დაელოდებოდა შვედეთის ნატოში გაწევრიანებას – ექსპერტი მიიჩნევს, რომ ეს არის მკაფიო გზავნილი ქვეყნის მოსახლეობისგან

Suomenmaa  ფინეთი

ფინელების უმრავლესობა თვლის, რომ ჰელსინკი არ უნდა დაელოდოს სტოკჰოლმს და ნატოში უნდა გაერთიანდეს. ამას მოწმობს კვლევის შედეგები, რომელიც Ilta-Sanomat-მა დაუკვეთა. საგულისხმოა, რომ მასში არ ფიგურირებდა კითხვა – საერთოდ უნდა გაერთიანდეს ფინეთი ნატოში თუ არა

ფინელების 28% მიიჩნევს, რომ ქვეყანა ნატოში შვედეთთან ერთად უნდა გაწევრიანდეს.

მოსახლეობის  უმრავლესობა კი არ დაელოდებოდა შვედეთის ალიანსში გაწევრიანებას, ასეთია კვლევის შედეგები, რომელიც Ilta-Sanomat-მა დაუკვეთა.

53% თვლის, რომ ფინეთის ნატოში შესვლა არ უნდა იყოს დამოკიდებული ამგვარი ნაბიჯის შვედეთის მიერ გადადგმაზე. 28% მიიჩნევს, რომ ნატოში გაწევრიანება უნდა მოხდეს შვედეთთან ერთად. 13%-ს არა აქვს ჩამოყალიბებული საკუთარი პოზიცია.

„ეს არის მკაფიო სიგნალი ქვეყნის ხელისუფლებისთვის მისი მოქალაქეებისგან და პროცესი უნდა განვითარდეს. უკან მობრუნება შეუძლებელია“ – ამბობს კვლევითი ორგანიზაცია Taloustutkimus-ის წამყვანი ექსპერტი – იუჰო რაჰკონენი.

პარტია „ჭეშმარიტი ფინელების“ მომხრეები, სხვებზე მეტად არიან დარწმუნებულნი, რომ გაწევრიანება უნდა მოხდეს შვედების ლოდინის გარეშე. ამ აზრისაა – პარტიის მხარდამჭერების 73%. „მემარცხენე კავშირის“ მომხრეების 58% კი მიიჩნევს, რომ ფინეთი უნდა დაელოდოს შვედეთს.

უფროს ასაკობრივ ჯგუფებში მოსაზრება – ფინეთი უნდა დაელოდოს შვედეთს – გაცილებით მეტადაა გავრცელებული.

ფინეთის ოფიციალურმა წარმომადგენლებმა არაერთხელ განაცხადეს, რომ ფინეთს სურს ალიანსში შვედეთთან ერთად გაწევრიანება. თუმცა მას შემდეგ, რაც თურქეთმა დაამუხრუჭა ალიანსში ახალი წევრების მიღების რატიფიკაცია და უკმაყოფილება გამოთქვა შვედეთის მიმართ, ფინეთში გაჩნდა სხვა მოსაზრებები მიმდინარე პროცესის თაობაზე.

ორგანიზაცია Taloustutkimus-მა გამოკითხა 1021 ადამიანი – 30 იავრიდან 1 თებერვლამდე პერიოდში. კვლევის სტატისტიკური ცდომილება შეადგენს – 3%-ს.