ამერიკელმა სენატორმა განაცხადა, რომ უკრაინას მოუწევს „ტერიტორიის ნაწილის დათმობა“

The Washington Times  აშშ

რემსი თაჩბერი

   სენატორმა ჯეი დი ვენსმა – კვირას განაცხადა, რომ აშშ-ს ოფიციალური პირები უნდა შეეგუონ იმას, რომ უკრაინას – რუსეთთან ბრძოლაში – აუცილებლად „მოუწევს ტერიტორიის ნაწილის დათმობა“

ოჰაიოელი რესპუბლიკელის განცხადება გახმიანდა კონგრესში – უკრაინისთვის დახმარების გაზრდის შესახებ მიმდინარე დისკუსიის ფონზე. დემოკრატები გამოდიან კიევის უპირობო მხარდაჭერის მოწოდებით, ხოლო რესპუბლიკელები ცდილობენ, ეს დახმარება აშშ-ს სამხრეთ შტატების განმტკიცების საკითხს მიაბან.

„ამერიკის ინტერესები მოითხოვს, ვაღიაროთ, რომ უკრაინას მოუწევს ტერიტორიის ნაწილის დათმობა რუსებისთვის და ჩვენ უნდა დავასრულოთ ეს გაშუალებული კონფლიქტი“ – განაცხადა ვენსმა, რომელიც გამოვიდა კიევის შემდგომი მხარდაჭერის წინააღმდეგ.

„როცა მე ვფიქრობ უზარმაზარ ადამიანურ ტრაგედიაზე, ვხვდები, რომ კონფლიქტი, რომელმაც შეიწირა ასობით ათასი უდანაშაულო აღმოსავლეთევროპელი, უნდა დასრულდეს, თანაც, რაც შეიძლება სწრაფად – ეს შედის ჩვენს და მათ ინტერესებში.“

პრეზიდენტმა ბაიდენმა – უკრაინისთვის მოითხოვა 60 მილიარდი დოლარი ეროვნული უშიშროების პაკეტის ფარგლებში, რაც მოიცავს ისრაელისა და ტაივანის მხარდაჭერასაც.

„რაც შეეხება უკრაინის საკითხს, ნებისმიერი, ვისაც ჭკუა მოეკითხება, ხვდება, რომ  საქმე ადრე თუ გვიან მოლაპარაკებით დასრულდება – განაცხადა სენატორმა ოჰაიოდან – თვით ის აზრი, რომ უკრაინა განდევნიდა რუსებს 1991 საზღვრებამდე, იყო აბსურდული. ამის არავის სჯეროდა“.

„ამიტომ ჩვენ ვეუბნებით პრეზიდენტს და მთელს მსოფლიოს: დროა მკაფიოდ ჩამოვაყალიბოთ ჩვენი მიზნები. რა შედეგი უნდა უზრუნველყოს 61 მილიარდმა დოლარმა ისეთი, რაც ვერ მოხერხდა ადრინდელი 100 მილიარდი დოლარით?“ – რიტორიკულად იკითხა მან.