ISW (Institute for the Study of War) აშშ
კაროლინა ჰერდი, გრეის მეპსი, ლეინ ფილიპსონი, ჯორჯ ბაროსი, კიტანე ფიტცპატრიკი, ნიკოლ ვოლკოვი და ფრედერიკ უ. კაგანი
დასავლური, უკრაინული და რუსული წყაროები მიუთითებს იმაზე, რომ დიდი ალბათობით, რუსეთი ემზადება შეტევისთვის. მათი პოზიცია თანხვდება ISW-ს შეფასებას იმის შესახებ, რომ იერიშის ყველაზე სარწმუნო ვადა – უახლოესი თვეებია. ნატოს თავჯდომარემ – იენს სტოლტენბერგმა 30 იანვარს განაცხადა: არ არსებობს რაიმე ნიშანი იმისა, რომ რუსეთი მზადაა სამშვიდობო მოლაპარაკებისთვის და რომ ყველა მონაცემი საპირისპიროზე მეტყველებსო. სტოლტენბერგმა აღნიშნა, რომ რუსეთს ძალუძს 200 ათასზე მეტი სამხედრო მოსამსახურის მობილიზება და ის აგრძელებს იარაღისა და საბრძოლო მასალების მოზიდვას შიდა წარმოების გაზრდისა და ისეთი ავტორიტარულ სახელმწიფოებთან არსებული პარტნიორული ურთიერთობის ხარჯზე, როგორიცაა – ირანი და ჩრდილოეთ კორეა.
სტოლტენბერგმა ხაზი გაუსვა იმას, რომ რუსეთის პრეზიდენტ პუტინს არ შეუცვლია თავისი მაქსიმალისტური მიზნები უკრაინაში. უკრაინის სახმელეთო ჯარების რეზერვისტთა საბჭოს მდივანი – ივან ტიმოჩკო, ამასთან დაკავშირებით აცხადებს, რომ დაგეგმილი შეტევის ფარგლებში, რუსეთი აძლიერებს თავის დაჯგუფებას დონბასში. ის აღნიშნავს, რომ რუსეთის არმია იძულებულია დაიწყოს შეტევა შიდა წნეხის გავლენით, რადგან მისგან დაჟინებით მოითხოვენ გამარჯვებას. სტოლტენბერგისა და ტიმოჩკოს განცხადებები ადასტურებს ISW-ის ამასწინანდელ პროგნოზს, რომ რუსეთის არმია ამზადებს პირობებს შეტევითი ოპერაციის დასაწყებად, რომელიც უახლოეს თვეებში, სავარაუდოდ ლუგანსკის ოლქიდან, დაიწყება. რუსი ბლოგერები ამზადებენ ნიადაგს რუსეთის იერიშისთვის და მოელიან შეტევის დაწყებას. სამხედრო ბლოგერები ამწვავებენ თავის განცხადებებს რუსულ TELEGRAM-არხებზე. რუსული არმიის ოპერაციების ახლანდელი ტემპი და ხასიათი მიუთითებს იმაზე, რომ ძირითადი ძალები მოსალოდნელი შეტევისა და გარღვევისთვის – „ომში ჯერ კიდევ არ ჩაბმულან“. მათი ეს პოზიცია გვაფიქრებინებს: რუსი მილიბლოგერები თვლიან, რომ რუსეთს ჯერ კიდევ არ გამოუყენებია იერიშისთვის საჭირო ელემენტები.