THE WASHINGTON TIMES აშშ
დონ ფედერი
წელს – ბიულეტენში მოგვეცემა ორი ძირეულად განსხვავებული ამერიკა. ამომრჩეველი იტყვის, რომელში უნდა ცხოვრება
ერთი ამერიკა – ენერგოდამოუკიდებელია. მეორეში – დარჩებით მყიფე რეჟიმის ხელში. ამაზეა დამოკიდებული: ამოძრავდება თუ არა ჩვენი მანქანები, ამუშავდება თუ არა ჩვენი ქარხნები, განათდება თუ არა ლამპიონები.
ერთი ამერიკა თვლის, რომ ენერგეტიკული კრიზისის საპასუხოდ, უნდა თხარო და ბურღო, მეორეს სურს, რომ ვიბუზებოდეთ სიბნელეში და ფეხით მივჩანჩალებდეთ სამსახურში – მწვანე დღის წესრიგის სახელით.
ერთ ამერიკაში – იცავენ საემიგრაციო კანონებს, ვინაიდან პრეზიდენტი რონალდ რეიგანი გვასწავლიდა, რომ ქვეყანა საზღვრების გარეშე არ არსებობს. მეორეში – ჩვენი სამხრეთ საზღვრიდან უწყვეტ ნაკადად შემოედინება არალეგალები – ბოროტმოქმედები, ტერორისტები, ასევე ქალები და ბავშვები, რომლებიც ხვდებიან მონობაში – და კიდევ შემოდის სასიკვდილო ნარკოტიკი. 2022 ფინანსური წლის განმავლობაში, საზღვარზე დააკავეს 2,4 მილიონი კაცი, თუმცა მათი უმრავლესობა სახლში არავის დაუბრუნებია, აღწერეს და ისე შემოუშვეს ქვეყანაში, ვითომ არაფერი. რაკი ვერ შეძლეს, დაერწმუნებინათ ამომრჩეველი საკუთარი პარტიის სარგებლიანობაში, დემოკრატებმა უბრალოდ გადაწყვიტეს – ახალი ელექტორატის იმპორტი.
ერთი ამერიკა – ესაა ღვთის ნებას მინდობილი ერი, როგორც ეს დამფუძნებელმა მამებმა გვიანდერძეს. მეორეში – ხელისუფლება რელიგიას შხამად მიიჩნევს. 2020 წლის საპრეზიდენტო არჩევნების დროს, ჯო ბაიდენმა ვერ შეძლო დამოუკიდებლობის დეკლარაციის ციტირება და „ღვთივბოძებული განუყოფელი უფლებების“ ნაცვლად, ამოილუღლუღა: „ყოველი ქალი და მამაკაცი შექმნილია, ნუ იცით… ვისგანაც“-ო. აშშ-ს დროშის ერთგულების ფიცი კი ეტყობა გულისხმობს: „ერთი ნაცია იმის ქვეშ… მოკლედ თავადაც იცით“-ს.
ერთი ამერიკა უარყოფს ილუზიას მამაკაცის სხეულში ჩაბუდებული ქალის შესახებ და თვლის, რომ ბიჭს ქალების ტუალეტში არაფერი ესაქმება და არავის სჯის „არასწორი“ ნაცვალსახელის გამოყენების გამო. მეორეს უნდა, რომ სახელმწიფო ჯანდაცვა აფინანსებდეს ჰორმონალურ და ქირურ გიულ ჩარევას ბავშვებში, რათა ისინი დაემგვანონ საპირისპირო სქესს. ერთი ამერიკას – სჯერა ბიოლოგიის, მეორეს – ფანტასტიკის.
ერთი ამერიკა იცავს უმანკოთა სიცოცხლეს, მეორეში – სრულად ჩამოყალიბებული ბავშვი, შეგიძლია მოსპო რამდენიმე წამში, ჯერ კიდევ დაბადებამდე. 2020 წლის კანონი ქალთა ჯანმრთელობის შესახებ, ნაბოძები დემოკრატების მიერ, ამკვიდრებს აბორტის უფლებას მოთხოვნისთანავე, თანაც ფედერალურ დონეზე.
ერთ ამერიკაში – ამერიკელ სამხედროებს ესმით, რომ მათი ვალია სამშობლოს დაცვა. მეორეში – საკუთარ დანიშნულებად მიაჩნიათ: სოციალური ინჟინერია, „ღირსების მარშები“ და კრიტიკული რასობრივი თეორიის პროპაგანდა. თუ ოდესმე წამოვიწყებთ პატარა „ომუკას“ – პენსილვანიის სლიფერი როკის უნივერსიტეტის ლგბტ-კლუბის წინამძღოლობით – ხომ წარმოგიდგენიათ, რა გადასარევ ფორმაში ვიქნებით!
ერთ ამერიკაში – უმაღლესი ღირებულება, ესაა – სამართლიანობა. მეორეში – თეთრკანიან ბავშვებს ასწავლიან საკუთარი თავის სიძულვილს, ხოლო კოლეჯებში ქადაგებენ „პოზიტიურ დისკრიმინაციას“.
ერთ ამერიკას სჯერა, რომ ყველაფერს აქვს თავისი ფასი, მეორეში – კი სწამთ, რომ ტრილიონობით დოლარის ფლანგვით გამოწვეულ ინფლაციასთან საბრძოლველად, საჭიროა კიდევ უფრო მეტი ტრილიონის ხარჯვა.
ერთ ამერიკაში – სტუდენტები აბარებენ კოლეჯებში, რომ მიიღონ ცოდნა. მეორეში – ამბოხებებს აწყობენ, აწესებენ ცენზურას, ებრძვიან სხვაგვარად მოაზროვნეებს, სწავლის დასრულების შემდეგ კი წვრილ კლერკებად მუშაობენ – Walmart-ში.
ერთ ამერიკაში – ხელისუფლებას ესმის, რომ მისი უმთავრესი მოვალეობაა – უდანაშაულოთა დაცვა. მეორეში – მეტროს სადგურებში მგზავრებს რელსებზე აგდებენ, პროკურორებს კი კი ის ურჩევნიათ, რომ ქუჩები გვამებით გაივსოს, ვიდრე გამოუსწორებელი ბოროტმოქმედები ციხეში გაუშვან. მკვლელობების დონე, უმაღლესია – ბოლო 25 წლის განმავლობაში.
ერთ ამერიკაში – ზრუნავენ უმუშევრებზე, მაგრამ მათ არ ანებივრებენ. მეორეში – ქალაქები მოფენილია მაწანწალათა კარვის ბანაკებით და ისინი კარგა ხანია იქცა დანაშაულის, გადამდები სნეულებების და ნარკომანიის ბუდეებად. თანაგრძნობის უმაღლეს გამოვლინებად, მიიჩნევა უფლება, რომ მაწანწალებს შეუძლიათ მოისაქმონ ქუჩაში.
ერთ ამერიკაში – პატრიოტიზმი ითვლება სათნოებად, მეორეში – მსახიობები და სპორტსმენები ერთმანეთს ეჯიბრებიან, თუ ვინ უკეთ აფურთხებს საკუთარ ქვეყანას სახეში. ითვლება, რომ ეს არის -„cool”,
რაკი რუსეთის ციხეში არ ხვდები.
ამ არჩევნებს საფუძვლად უდევს კონფლიქტი – დაპირისპირება ორ მსოფლხედვას შორის. ერთი მხარე ხელმძღვანელობს კონსტიტუციით, საბაზრო ეკონომიკითა და იუდეურ-ქრისტიანული ეთიკით, მეორე – სოციალიზმით, კულტურული მარქსიზმითა და წარმართული მორალით.
ეს არჩევნები გადაწყვეტს თუ საით მივდივართ: გაკურნებისკენ თუ დაღუპვისკენ. სწორედ ამ უკანასკნელისკენ მიგვაქანებენ დემოკრატები. ყოფილ სახელმწიფო მდივან – ჰილარი კლინტონს, ასევე ყოფილ პრეზიდენტებს – ბილ კლინტონს და ბარაქ ობამას კი გვერდზე გავყავართ და ყურში ჩავგჩურჩულებენ, რომ დამნაშავეობასთან ბრძოლა, ინფლაცია და არალეგალური იმიგრაცია – ეს რესპუბლიკელების სალაპარაკო ენაა.