Bloomberg აშშ
მაიკლ ბლუმბერგი – Bloomberg LP-ს დამფუძნებელი
სუვალის დერეფნიდან – ტაივანის ყურემდე… პოტენციური კრიზისების დეფიციტს, აშშ-ს შეიარაღებული ძალები არ განიცდის. თუმცა ყველაზე სერიოზული გამოწვევა, მათივე თვალწინაა. ლაპარაკია იმ ამერიკელთა რაოდენობის განუხრელ კლებაზე, რომელთაც შეუძლიათ და სურთ არმიაში სამსახური. თუ სამხედრო უპირატესობის შენარჩუნება სურს, მაშინ პენტაგონმა უნდა გადაიაზროს საკითხი, თუ როგორ აპირებს ის ახალგაზრდების მობილიზაციასა და კადრების შენარჩუნებას შეიარაღებულ ძალებში. ის ასევე უნდა ემზადოს იმისთვის, რომ სამომავლოდ მოუწევს ომის წარმოება გაცილებით მცირერიცხოვანი რეგულარული ძალებით
თუ დღევანდელ ტენდენციებს გავითვალისწინებთ, პროგნოზი არასახარბიელოა. დასახული მიზნების მისაღწევად და 1.3-მილიონიანი არმიის შესანარჩუნებლად, საჭიროა 150 000 ახალგაზრდის გაწვევა ექვსივე სახეობის ჯარში. ფინანასური წლის დასრულებამდე სულ 2 თვე რჩება, პენტაგონი კი დასახულ ამოცანას 15%-ით ასრულებს. ახალწვეულების განსაკუთრებული დეფიციტია სახმელეთო ჯარებში. ივნისის მონაცემებით, 2022 წლის დასაწყისიდან, სახმელეთო ჯარებში სამსახურს დათანხმდა 22 ათასი ახალგაზრდა, რაც 60%-ით ჩამორჩება ყოველწლიურ გეგმას. წლის ბოლოსთვის, ამ სახეობის ჯარებში სავარაუდოდ იქნება 44 000 კაცი, ანუ 40 ათასით ნაკლები – კონგრესის მიერ დადგენილ კვოტაზე.
შექმნილი ვითარების ერთ-ერთი მიზეზი, მეტად მჭიდრო შრომის ბაზარია, თუმცა გაცილებით დიდი პრობლემაა პოტენციური ჯარისკაცების რესურსის კლება. ჭარბწონიანობისა და ნარკომანიის მიზეზით – 17-25 წლამდე ამერიკელების რესურს – 23% აკლდება. კიდევ 12% სწავლობს კოლეჯებში. საბოლოოდ კი რჩება სულ 12%. სამხედრო უწყების შეფასებით, იმ კონტიგენტიდან, რომელიც ვარგისია სამხედრო სამსახურისთვის, მხოლოდ 9% გეგმავს სამხედრო კარიერას – ეს არის ყველაზე დაბალი ნიშნული 2007 წლიდან, ანუ ერაყის კამპანიის დროიდან მოყოლებული.
ამ დანაკლისის შესავსებად, აშშ-ს შეიარაღებული ძალები აპირებენ, 45 დღის განმავლობაში, 35 000 დოლარი გადაუხადონ ყველა ახალგაზრდას, რომელიც შეუდგება საბაზისო სამხედრო მომზადებას. შეიარაღებულ ძალებში დასაქმების მსურველებს, ასევე აძლევენ უფლებას აირჩიონ ჯარის სახეობა. ახლა ახალგაზრდებს აქვთ შესაძლებლობა იმსახურონ შემცირებული ვადით – 2 წლით, ნაცვლად სტანდარტული 4 წლისა.
მართალია სტუმულირების ეს ხერხები გონივრული ჩანს, მაგრამ სხვა ინიციატივების (მაგალითად ის, რომ დაიწიოს ფიზიკური მზადყოფნის მოთხოვნა და გამარტივდეს არმიაში დასაქმების პროცედურა იმგვარად, რომ არ იქნას გათვალისწინებული ნარკოტიკული დამოკიდებულება და სხვა ტიპის დაავადებები) დანერგვა არმიაში, გამოიწვევს ბრძოლისუნარიანობისა და დისციპლინის დაქვეითებას. არსებობს მოსაზრება, შეიქმნას მოსამზადებელი ბანაკები მათთვის, ვისაც სურს არმიაში სამსახური, მაგრამ დაბალი შედეგები აჩვენა საკვალიფიკაციო გამოცდებზე. ამ მოთხოვნების შერბილებამ, საბოლოო ჯამში, შეიძლება გამოიწვიოს კომპეტენციის კლება შეიარაღებულ ძალებში.
სტანდარტების დაწევის ნაცვლად, პენტაგონმა უნდა აირჩიოს უფრო პრაგმატული პოზიცია. აუცილებელია შეიარაღებულ ძალებში ყურადღება მიექცეს კადრების შენარჩუნებას ისე, როგორც ეს საზღვაო ფეხოსნებმა მოახერხეს. ფინანსური ბონუსები, კარიერული წინსვლის მოქნილი სისტემა და ახალი უნარების შეძენის სტიმული, გაცილებით გააღვივებს სამხედრო კარიერის გაგრძელების სურვილს. პენტაგონმა უნდა გააფართოოს რეკრუტირების არეალი და მობილიზაციის პუნქტები შექმნას იმ რაიონებსა და ქალაქებში, სადაც ნაკლებ ინტერესს იჩენენ არმიაში სამსახურისადმი.
მიუხედავად ყველა ამ ძალისხმევისა, განჭვრეტად მომავალში აშშ-ს არმიას მოუწევს ისწავლოს გაცილებით მცირე კონტიგენტით ოპერირება. ინვესტიციები უპილოტო სისტემებში, ხელოვნური ინტელექტი და ზეზუსტი საბრძოლო იარაღი, შეამცირებს ცოცხალი ძალაზე მოთხოვნილებას. უფრო მჭიდრო თანამშრომლობა კერძო სექტორთან და კომერციული ტექნოლოგიების გამოყენება, პენტაგონს საშუალებას მიცემს გადაჭრას ტექნიკური ამოცანები, სამოქალაქო პირებსა და დამქირავებლებს შესთავაზოს, ვთქვათ – IT მომსახურება. აშშ-მ, ასევე უნდა დაარწმუნოს რეგიონული მოკავშირეები, პირველ რიგში ნატოელი პარტნიორები ევროპაში, შეიტანონ უფრო მეტი წვლილი კოლექტიურ თავდაცვაში. იმისთვის, რომ გლობალური მასშტაბის გამოწვევებს უპასუხოს, აშშ-ს შეიარაღებული ძალები, უნდა სჯობდეს სხვა ქვეყნების არმიებს.
გამოცდილი კადრების შენარჩუნება არმიაში და ახალი ტექნოლოგიების გამოყენება, აშშ-ს დაეხმარება, გადაჭრას შევსების პრობლემა ისე, რომ ამას არ შეეწიროს – მისი ტრადიციულად ძლიერი მხარეები.