Geopolitika.news ხორვატია
ზორან მეტერი
პირველი მსოფლიო ომის დასრულების შემდეგ, გერმანელმა პოლიტოლოგმა – ოსვალდ შპენგლერმა გამოაქვეყნა ცნობილი თხზულება – „ევროპის დაისი“. ბუნებრივია, მას საამისოდ მრავალი მიზეზი ჰქონდა. ის ჭვრეტდა იმ საშინელებებს, რაც ბებერმა კონტინენტმა გადაიტანა. ყოველივე ამის შედეგად, მისი სამშობლო აღმოჩნდა დამარცხებული, გამოფიტული, დამცირებული და მორალურად განადგურებული
მსჯელობდა რა „ბებერ კეთილ ევროპაზე“, შპენგლერი წერდა ასეთ რამეს: „შენ მოკვდები, მე ვხედავ შენში კვდომის ყველა ნიშანს. შემიძლია დაგიმტკიცო, რომ მთელი შენი სიმდიდრე და შენი სრული სიღატაკე, შენი კაპიტალიზმი და შენი სოციალიზმი, შენი ომები და შენი რევოლუციები, შენი ათეიზმი, შენი პესიმიზმი და ცინიზმი, შენი ამორალურობა, შენი დანგრეული ოჯახები და შენს მიერ დაწესებული კონტროლი შობადობისა, ჟონავს შენივე ფერხთით – სისხლის ბოლო წვეთამდე და გსპობს ზემოდან. ის კლავს შენს ტვინს და განადგურებს. მე ვამტკიცებ, რომ შენ გადევს დამღა ყველა ძველი, აწ უკვე განადგურებული ქვეყნისა, ალექსანდრია იქნება ეს, საბერძნეთი თუ რომი.“
დამეთანხმებით, თუ კაცმა არ იცი, რომელ ეპოქაზეა საუბარი, იფიქრებ, რომ ზემოთქმული აღწერს თანამედროვე ევროპას, უფრო ზუსტად ე.წ. „კოლექტიურ დასავლეთს“, რომელიც აღმოჩნდა ვითარებაში, რომელზეც მოგვითხრობდა გერმანელი მოაზროვნე. ის, რასაც დღეს ევროპელები სჩადიან საკუთარი თავისა და დანარჩენი სამყაროს წინაშე ( გავიხსენოთ ევროპული კოლონიალისტური სახელმწიფოები და ის ბოროტება, რაც მათ ჩაიდინეს მთელ დედამიწაზე, რის შედეგებსაც დღემდე იმკის ზოგიერთი ხალხი), ამის გაკეთება, ალბათ სხვას არავის შეუძლია.
მესამე მსოფლიო ომი – კომფორტის ნაცვლად
ეევროპელები მიეჩვიენ კომფორტს, მშვიდ ცხოვრებას და ასე გასტანა ნახევარ საუკუნეზე მეტმა. ტყუილად ეგონა ზოგიერთს, რომ ევროპამ დასკვნა გამოიტანა სისხლიანი, მძიმე წარსულისაგან. ყველაზე მეტად ეს ეხება – მეორე მსოფლიო ომს, რომელშიც ის ჩაითრია ადოლფ ჰიტლერმა, გერმანიის ნაცისტურმა იდეოლოგიამ და ყოველივე ეს ღრმად ჩაიბეჭდა მის მეხსიერებაში, თუმცა მოგონებები დავიწყებას ეძლევა, ამასთან ჩლუნგდება სიფრთხილე – ოდესღაც ხომ ყოველივე (მათ შორის – კარგი) მთავრდება.
სინამდვილეში „დიდმა ძმამ“ ევროპას განუცხადა, რომ დადგა დრო – გადაიხადოს საფასური „უსაფრთხოების ქოლგისთვის“, რომლის ქვეშ შეყუჟულიც ვითარდებოდა ის მრავალი ათწლეული. მეტიც, მან უნდა გაიღოს მსხვერპლი და არა მარტო ფულის, არამედ ადამიანების სიცოცხლისა და მატერიალური სიკეთეების სახით.
„ომი – უკვე თქვენს კართანაა“- ამბობს დიდი ძმა და აკეთებს ყველაფერს, რომ ის დაიწყოს. დაიწყოს სად? რა თქმა უნდა – ევროპაში.