რუსეთი აგრძელებს დაბომბვას და ინარჩუნებს პოზიციებს კიევის მახლობლად – მიუხედავად მოსკოვის დაპირებისა, რომ შეამცირებდა თავისი ძალების რაოდენობას

CNBC  აშშ

თედ ქემფი

 „მნიშვნელოვანი“ რუსული დაბომბვა და სარაკეტო დარტყმები გრძელდება ქალაქ ჩერნიგოვზე, რუსეთის შეიარაღებული ძალები რჩებიან კიევის მახლობლად, მიუხედავად მოსკოვის დაპირებისა, განაცხადა ოთხშაბათს დიდმა ბრიტანეთმა

„რუსეთის არმია ინარჩუნებს პოზიციებს კიევის აღმოსავლეთითა და დასავლეთით, მიუხედავად გარკვეული შენაერთების გაყვანისა ამ ადგილებიდან“- განაცხადა ბრიფინგზე დიდი ბრიტანეთის თავდაცვის სამინისტრომ სადაზვერვო მონაცემებზე დაყრდნობით.

ჩერნიგოვი განლაგებულია 90 მილის (145კმ) მანძილზე – კიევის ჩრდილოეთით და 40 მილზე (64კმ) – რუსეთის საზღვრიდან სამხრეთით.

ოთხშაბათს, რუსეთის თავდაცვის უწყების წარმომადგენელმა განაცხადა, რომ მოსკოვი „მკვეთრად“ შეამცირებდა სამხედრო აქტივობას ჩერნიგოვისა და კიევის მახლობლად, იუწყება NBC news-ი.

აშშ-ს სახელმწიფო მდივანი ენტონი ბლინკენი, ყველას ურჩევს, ფრთხილად მოეკიდონ მოსკოვის დაპირებებს. რუსეთის თავდაცვის სამინისტრომ – დააყოვნა ამ საკითხზე CNBC-თან კომენტარი.

ბრიტანეთის თავდაცვის უწყებამ განაცხადა, რომ უახლოეს დღეებში „კიევის შემოგარენში, სავარაუდოდ გაიმართება“ მძიმე ბრძოლები. გასული კვირიდან მოყოლებული, უკრაინელი მებრძოლები იუწყებიან დედაქალაქის მიმდებარე ქალაქების დაბრუნების შესახებ, მაგრამ ამ განცხადებების გადამოწმება რთული, ხშირად კი შეუძლებელია.

„ერთი რასაც ვხედავთ, ისაა, რომ უკრაინელები იყენებენ ამ შესაძლებლობას და ცდილობენ რუსების უკუგდებას ყველა ხელმისაწვდომი ადგილიდან“- განაცხადა NBC news-ის კორესპონდენტმა გლობალური უსაფრთხოების საკითხებში, დენ დე ლიუსმა.

გააფთრებული ბრძოლები მიმდინარეობს მარიუპოლში, ქვეყნის სამხრეთში – ბრიტანეთის თავდაცვის უწყება იტყობინება, რომ ქალაქის დამცველები, ჯერ კიდევ ინარჩუნებენ მარიუპოლის ცენტრს. ქალაქი დიდწილად დანგრეულია რუსული არტილერიისა და სარაკეტო იერიშების შედეგად.