გაიმარჯვებს თუ არა უკრაინა? მხოლოდ ყოველ მეათე გერმანელს სჯერა ამის

WirtschaftsWoche Heute  გერმანია

მაქს ბიდერბეკი

სულ უფრო ნაკლებ გერმანელს სჯერა იმისა, რომ უკრაინა სძლევს რუსეთს. ამაზე მეტყველებს კვლევის შედეგები, რომელიც ალენსბახის საზოგადოებრივი აზრის შემსწავლელმა ინსტიტუტმა (IFD) – კონსალტინგური კომპანია Centre for Strategy and Leadership-ის დაკვეთით ჩაატარა. გამოკითხვის თანახმად, 2024 წლის დასაწყისისთვის – ყოველი 10 გერმანელიდან, მხოლოდ ერთს სჯერა, რომ უკრაინა გაიმარჯვებს. გასულ წელს, 16% ფიქრობდა,  რომ რუსული არმიის უკუგდება მოხერხდებოდა. დღეს რესპონდენტების მესამედი თვლის, რომ მოსკოვი საბოლოოდ გაიმარჯვებს

დარჩება თუ არა ამერიკა – გერმანიის პარტნიორად?

იმავდროულად აშშ-სადმი, როგორც სანდო პარტნიორისადმი რწმენა – განუხრელად მცირდება. ალენსბახის ინსტიტუტის ანგარიშის თანახმად, გერმანელების მხოლოდ 39% არის დარწმუნებული, რომ აშშ-სთან კავშირი, კვლავ მტკიცე იქნება. მესამედზე ოდნავ ნაკლებს ეეჭვება ვაშინგტონის სანდოობა. შესაძლოა ეს უკავშირდება დონალდ ტრამპის მოსალოდნელ გამარჯვებას, რაც ნატოსთვის ნამდვილი საფრთხეა. მისი პირველი პრეზიდენტობის დროს, გერმანელი მოსახლეობის რწმენა უმთავრესი ნატოელი მოკავშირის მიმართ, იყო რეკორდულად დაბალ ნიშნულზე.

თუ შეერთებული შტატები შეაჩერებენ უკრაინის დახმარებას, რასაც ბევრი ელის, ეს აისახება გერმანიაზეც, რომელიც პოტენციურად შესაძლოა აღმოჩნდეს კიევის მთავარი დასავლელი მოკავშირე. რესპონდენტების 31%-ზე ოდნავ ნაკლებს სურს, რომ შემცირდეს უკრაინის დახმარება თუ სიტუაცია, სწორედ ასეთი სცენარით წარიმართა. უკრაინისთვის სამხედრო დახმარების ახალი პარტიების გამოყოფის  საკითხი, სულ უფრო ნაკლებ მხარდაჭერას ჰპოვებს მოსახლეობაში – განსაკუთრებით აღმოსავლეთ ევროპაში.

მეორე მხრივ, გერმანელების მხოლოდ 20% არის მზად, რომ უკრაინას დამატებითი დახმარება გაუწიოს. „საგანგაშო სიგნალია, თუ გავითვალისწინებთ, რომ კონფლიქტის გადამწყვეტ ეტაპზე ვიმყოფებით“ – ამბობს ანგარიშის უსაფრთხოების ნაწილის თანაავტორი – კლაუს შვაინსბერგი. იმავდროულად, გერმანიის მოქალაქეებს სურთ, რომ მეტი სახსრები ჩაიდოს ბუნდესვერის აღჭურვაში. გამოკითხულთა ნახევარზე მეტი, ვერ ხედავს რამდენადმე შესამჩნევ პროგრესს ამ მიმართულებით. 39%-ს უკვე აღარ სჯერა, რომ სიტუაცია გერმანიის შეიარაღებულ ძალებში გაუმჯობესდება. კვლევის ავტორები ასევე იტყობინებიან, რომ სკეპტიკური განწყობილებები მთავრობის თავდაცვის პოლიტიკის მიმართ, მნიშვნელოვნად გაძლიერდა.