Breitbart / აშშ
პიტერ ქედლი
კვირას უნგრეთის პრემიერ-მინისტრმა ვიქტორ ორბანმა განაცხადა, რომ მას, ვისაც ევროკავშირში მმართველობის საჭე უპყრია ხელთ და სურს დაიმორჩილოს უნგრეთი, ელის იგივე ბედი, რაც საბჭოთა დიქტატორებს ერგოთ
ამგვარი კომენტარები გაისმა 1956 წლის ანტიკომუნისტური ამბოხების მესამოცე წლისთავზე. რევოლუციამ იმხანად ფართო მხარდაჭერა ჰპოვა მოსახლეობაში, მაგრამ ის ჩაახშეს რუსული თავდასხმით, რასაც ათასობით უნგრელი შეეწირა.
ორბანმა ხაზი გაუსვა, რომ დამარცხებული ერიც, ზოგჯერ გამარჯვებულია, ხოლო ნებისმიერი სახელმწიფო, რომელიც ცდილობს უნგრეთის გამოწვევას, ადრე თუ გვიან იღუპება.
„1995 წლის გაკვეთილი – ნათელია. ის, ვინც ოცნებობს ყელზე მუხლი დაგვაჭიროს, განწირულია მარცხისთვის – თქვა პრემიერმა – ჩვენ გავუძლეთ, როცა თავს დაგვესხა პირველი დამპყრობელი იმპერია და მედგრად ვიდგებით მანამდე, ვიდრე უკანასკნელიც არ დაემხობა.“
ორბანმა მკაცრად გააკრიტიკა ევროკავშირი და მისი მაღალჩინოსნები – საბჭოთა დიქტატორებს შეადარა.
„ყურადღებას ნუ მიაქცევთ მათ, ვისაც მიზანში ვყავართ ამოღებული ბუჩქებიდან ან ბრიუსელის სიმაღლეებიდან – განუცხადა ორბანმა შეკრებილთ – ისინი, ისევე დაასრულებენ, როგორც მათმა წინამორბედებმა დაასრულეს.“
ევროპის კავშირში დიდი ხანია ამრეზით უყურებენ ორბანსა და მის ადმინისტრაციას და ეს დამოკიდებულება კიდევ უფრო მტრული გახდა მას შემდეგ, რაც წლის დასაწყისში საყოველთაო არჩევნები ჩატარდა, რომელზეც მოქმედმა პრემიერმა დამაჯერებლად გაიმარჯვა ფართო კოალიციაზე, რომელიც მის ჩამოგდებას ლამობდა.
გამარჯვების შემდეგ, რომელიც დადგა, მიუხედავად უნგრული ოპოზიციის ძლიერი საგარეო მხარდაჭერისა, ოფიციალური პირები ბრიუსელიდან, ცდილობენ, ყველანაირად „გააშაონ“ ქვეყანა. ევროპის პარლამენტმა წინა თვეში რეზოლუციაც კი მიიღო, სადაც ამტკიცებენ, რომ „უნგრეთი უკვე აღარ არის დემოკრატია.“
ორბანის ხელისუფლებაში – რეზოლუციას მხოლოდ დასცინეს, ხოლო პრემიერის საერთაშორისო წარმომადგენელმა ჟოლტან კოვაჩმა აღნიშნა, რომ ხალხს, რომელმაც უნგრეთს „ჰიბრიდული წარმომადგენლობითი ავტოკრატია“ უწოდა, სწამს, რომ მამაკაცებსაც შეუძლიათ ბავშვის გაჩენა.
ის, რაც სასაცილო ნამდვილად არ არის, გახლავთ ევროკავშირის სანქციები, რომელთა მიღებასაც ბრიუსელი ცდილობს უნგრეთის წინააღმდეგ. ევროკრატებს სურთ, ქვეყანას შეუჩერონ გრანტები და მილიარდობით დოლარი, რათა ორბანის პოზიციები შეარყიონ.
უნგრეთის მოკავშირე პოლონეთმა, პრემიერ-მინისტრ მათეუშ მორავეცკის მეთაურობით, ამ ნაბიჯს – „უკანონო“ უწოდა. მორავეცკიმ პირობა დადო, რომ „მთელი ძალით შეეწინააღმდეგება“ უნგრეთისთვის გადასაცემი სახსრების ბლოკირებას.
პროევროპული გამოცემა Euroactiv-მა ივარაუდა, რომ ეს მოასწავებს უნგრეთ-პოლონეთის კავშირის აღდგენას, მიუხედავად ორ ქვეყანას შორის არსებული აზრთა სხადასხვაობისა – უკრაინის კონფლიქტზე.