უცხოურ სააგენტოთა მასალების მიხედვით
2022 წლის 4 თვის განმავლობაში, საქონელბრუნვა შვეიცარიასთან – 34%-ით გაიზარდა, ხოლო ქართული პროდუქციის ექსპორტმა შვეიცარიის ბაზრებზე – 45%-ით მოიმატა
საქართველოს სავაჭრო-სამრეწველო პალატამ და შვეიცარიის გაერთიანებულმა სავაჭრო პალატამ, ხელი მოაწერეს ურთიერთგაგების მემორანდუმს მრგვალი მაგიდის მიმდინარეობისას, რომელიც დაეთმო საქართველოში შექმნილი ბიზნესგარემოსა და ქვეყნის ეკონომიკური შესაძლებლობების განხილვას.
მრგვალი მაგიდა, რომელიც ორგანიზებული იყო შვეიცარიის კონფედერაციაში საქართველოს საელჩოსა და შვეიცარიის გაერთიანებული სავაჭრო პალატის მიერ, გაიმართა ბერნში. ღონისძიებაში მონაწილეობდნენ შვეიცარიის ფედერალური დეპარტამენტისა (SECO) და ამ ქვეყნის 40-ზე მეტი კომპანიის წარმომადგენლები.
ძირითადი ყურადღება დაეთმო ტრანსპორტისა და ლოგისტიკის, საინფორმაციო ტექნოლოგიების, ენერგეტიკისა და სოფლის მეურნეობის საკითხებს.
შვეიცარიის ბიზნესსაზოგადოების წინაშე – გამოვიდა ეკონომიკის მინისტრის თანაშემწე გენადი არველაძე, რომელმაც ყურადღება გაამახვილა საქართველოსა და შვეიცარიას შორის არსებულ ეკონომიკურ კავშირებზე და აღნიშნა, რომ მათ განვითარებას, განსაკუთრებული იმპულსი მისცა – ორ ქვეყანას შორის მიღწეულმა თავისუფალი ვაჭრობის შეთანხმებამ.
არველაძის ინფორმაციით, 2022 წლის მხოლოდ 4 თვის განმავლობაში, შვეიცარიასთან საქონელბრუნვა გაიზარდა 34%-ით, ხოლო ქართული პროდუქციის ექსპორტმა შვეიცარიულ ბაზრებზე შეადგინა 45%. მინისტრის თანაშემწის თქმით, პოტენციალი დიდია, მისი ათვისება კი აუცილებელი.
არველაძემ ასევე აღნიშნა, რომ საქართველოს, როგორც რეგიონის მნიშვნელოვანი სატრანსპორტო-ლოგისტიკური მიმართულების როლი, რთული გეოპოლიტიკური სიტუაციის პირობებში, განსაკუთრებით გაიზარდა.
მან დამსწრე საზოგადოებას გააცნო საქართველოში მიმდინარე სამთავრობო პროგრამების შესახებ, რომლებიც მიზნად ისახავს ქვეყანაში ინვესტიციების მოზიდვასა და ბიზნესის სტიმულირებას, რამაც შვეიცარიული კომპანიების მხრიდან – დიდი ინტერესი გამოიწვია.
ამას გარდა, მრგვალი მაგიდის მონაწილეები გაეცნენ საქართველოს ეკონომიკაში არსებულ ტენდენციებს, პრობლემებსა და შესაძლებლობებს.
როგორც არველაძემ განაცხადა, თანმიმდევრული ეკონომიკიური პოლიტიკისა და კერძო სექტორის მიზნობრივი მხარდაჭერის შედეგად, მიუხედავად საგარეო შოკებისა, ეკონომიკური საქმიანობის, საგარეო ვაჭრობის, ტურიზმისა და ტრანსპორტის სფეროებში შეიმჩნევა დადებითი დინამიკა.
მინისტრის თანაშემწემ მოიყვანა სტატისტიკური მაჩვენებლები, რომელთა მიხედვით, რეგიონში გეოპოლიტიკური დაძაბულობის მიუხედავად, მარტში ეკონომიკურმა ზრდამ – 10.6% შეადგინა, ხოლო აპრილში, მიუხედავად წინა წლის მაღალი საბაზისო ეფექტისა, ეკონომიკური ზრდა ასევე დადებითი იყო.
მისი თქმით, იმ დინამიკიდან გამომდინარე, რომელიც იანვარ-აპრილში შეიმჩნევა, საქართველოს მთავრობა პროგნოზირებს, რომ 2022 წელს ეკონომიკური ზრდა 6%-ს შეადგენს, თუმცა სავსებით რეალურია კიდევ უფრო მაღალი მაჩვენებელი.
ამას გარდა, ღონისძიებაზე განიხილეს საქართველოს ენერგეტიკული პოტენციალი და განახლებადი ენერგიის წყაროები, ასევე სოფლის მეურნეობის საინვესტიციო შესაძლებლობები.