Berlingske დანია
ემილ როტბიოლი
ვიზიტი, მოგვაგონებდა ეპიზოდს სერიალიდან ,,კლოუნი’’ და მისი მიმდინარეობისას უხერხული მომენტები გვხვდებოდა, სულ უფრო მეტად და მეტად.
მიუხედავად, წინასწარ გამოთქმული არაერთგზის გაფრთხილებისა, ჟოზეფ ბორელი დაჟინებით მოითხოვდა ამ ვიზიტის გამართვას, რადგან სჯეროდა რუსი კოლეგების კეთილგონიერების. მაგრამ ყველაზე მწვავე კრიტიკოსებიც არ მოელოდნენ, რომ მისი ეს მოგზაურობა მოსკოვში, ასეთ კატასტროფად იქცეოდა, სადაც ევროპის საგარეო პოლიტიკური უწყების მეთაური, კაკალივით დაფშვნეს
საქმე ისაა, რომ ვლადიმერ პუტინმა უკუაგდო ყველა დიპლომატიური წესი, რათა თავი დაეძვრინა თავდაცვითი პოზიციიდან, რომლის დაკავებაც მას მოუხდა. რუსეთი გადავიდა შეტევაზე და აამოქმედა ახალი გეგმა, რომლის ერთ – ერთი პირველი მსხვერპლი, ბორელი აღმოჩნდა.
,,ეს იყო ყველასთვის თვალსაჩინო მომენტი’’- უთხრეს Berlingske-ს ევროპელმა დიპლომატებმა, თავად ჟოზეფ ბორელმა ვიზიტს უწოდა ,,მოსინჯვა’’ იმისა, რისთვისაა მზად რუსეთი. არადა, ეს უფრო გაფრთხილებას ჰგავდა.
მატარებლის კატასტროფა შენელებული კადრებით
პირველი ნიშნები იმისა, თუ რა მოხდებოდა, გამოჩნდა პარასკევ დილით, ბორელისა და რუსეთის საგარეო საქმეთა მინისტრის, სერგეი ლავროვის პრესკონფერენციამდე.
ოპოზიციის დაპატიმრებული ლიდერი, ალექსეი ნავალნი სასამართლოს წინაშე წარდგა, ოთხშაბათს გამოტანილი განაჩენის შემდეგ, ხელახლა, ამჯერად, ახალი ბრალდებით.
ამით, რუსეთმა შეამზადა ნიადაგი საიმისოდ, რომ გამოეთქვა პასუხი ,,შეშფოთებაზე“ , რომელიც ნავალნის საქმეს უკავშირდება – ასეთი იყო ევროკავშირისა და ბორელის ოფიციალური რეაქცია.
მალე ნათელი გახდა, რომ 70 წლის რუსმა მინისტრმა-ვეტერანმა, ნაბიჯ – ნაბიჯ შეძლო 73 წლის ესპანელი კოლეგის წინასწარ დაგებულ მახეში შეტყუება. თანაც ისე, რომ ეს უკანასკნელი, უბრალოდ დაბნეულ მოხუცად გამოიყურებოდა.
პირველი კითხვის დასმის უფლება, პრესკონფერენციაზე სახელმწიფო სააგენტო ,,სპუტნიკს’’ მიეცა. ამით აიძულეს ბორელი ესაუბრა კუბის შესახებ, ანუ იმ საკითხზე, რამაც კონფლიქტი გამოიწვია ევროკავშირსა და აშშ-ს შორის.
შემდეგ, ბორელმა გულმოდგინედ დაიწყო პოზიტიური სიგნალების გაშვება. მაგალითად, მან თქვა, რომ ნავალნის საქმის გამო, ევროკავშირი არ გეგმავს ახალ სანქციებს რუსეთის წინააღმდეგ, (თუმცა ევროკავშირის ბევრი წევრი სწორედ ამას მოითხოვს დაჟინებით) და რომ რუსული ვაქცინა ,,სპუტნიკი’’ – ეს კაცობრიობის დიდი გამარჯვებაა და ევროკავშირს სურს მისი შეძენა (თუმცა ევროკავშირს, მისი გამოყენების ნებართვა არ გაუცია).
ამ დროს კი, სერგეი ლავროვმა ერთსაათიან პრესკონფერენციაზე ევროკავშირს – ,,არასანდო პარტნიორი’’ უწოდა და ირიბად მიანიშნა, რომ ანგელა მერკელი – ცრუპენტელაა ( ეს ნავალნის საქმის კონტექსტში ითქვა). გზადაგზა, მან ბორელის ბოსტანშიც ისროლა კენჭები – ესპანეთი დაადანაშაულა, რომ მას კატალონიელი სეპარატისტები ციხეში ჰყავს გამოკეტილი, როგორც პოლიტიკური ტყვეები. ამ ბრალდებით კბილი გაჰკრა თავად ბორელსაც, რომელიც კატალონიელია.
ფინალი
ბორელი იხტიბარს არ იტეხდა, მაგრამ მისი გვემა პრესკონფერენციით არ შემოფარგლულა.
ბორელი და ლავროვი, ერთმანეთთან კიდევ ურთიერთობდნენ წახემსებისას, როცა ბორელის კონსულტანტმა უეცრად ტვიტერში ამოიკითხა, რომ რუსეთმა გააძევა შვედეთის, პოლონეთის და გერმანიის დიპლომატები – იმიტომ, რომ ისინი თვალს ადევნებდნენ ნავალნის მხარდამჭერ დემონსტრაციას.
Politico-ს წყაროების მიხედვით, ბორელმა მაშინვე მიმართა ლავროვს ამ ინფორმაციის განმარტებისთვის, მაგრამ ლავროვმა წუხილი მხოლოდ იმის გამო გამოთქვა, რომ ამ ინფორმაციამ დროზე ადრე გაჟონა. ეს გასაჯაროება, მხოლოდ ორშაბათისთვის იყო დაგეგმილი – ასეთი იყო ახსნა-განმარტება ევროპისთვის გაწნულ მორიგ ალიყურზე.
Reuters -ის ცნობით, შვედეთმა საპასუხოდ გააძევა რუსი დიპლომატი, ხოლო გერმანიამ და პოლონეთმა რუსი დიპლომატები ნონ გრატად გამოაცხადეს.
და ბოლოს, ბორელმა, რომელიც ალბათ მოსკოვის სასტუმროს ნომერში იჯდა და ცდილობდა მომხდარი გაეანალიზებინა, იხილა რუსეთის ოფიციალურ ექაუნთზე ხსენებული პრესკონფერენციის კადრები, წარწერით ,,უკომენტაროდ.’’ ეს,ალბათ, კიდევ ერთი მწიკვი მარილი იყო მის ჭრილობაზე მოყრილი.
ვიდეო რგოლში ნაჩვენებია, როგორ აკრიტიკებს გასულ აგვისტოში, ნავალნი პუტინს, ვაქცინა ,,სპუტნიკ-5’’ – ის შემოღებისთვის. ამას მოსდევს კადრები, სადაც ბორელი ვაქცინას, რუსეთის უზარმაზარ წარმატებად მოიხსენიებს.
რატომ ჩაიდინეს მათ ეს?
ახლა ბევრი ითხოვს ბორელის გადაყენებას. ერთი მხრივ, ესაა ევროკავშირის უზარმაზარი დამცირება და ამასთან, შიდა განხეთქილებისთვის ნიადაგის მომზადება. მეორეს მხრივ, კატასტროფულმა ვიზიტმა, შესაძლოა ევროკავშირის ქვეყნები უფრო შეაკავშიროს.
თებერვლის ბოლოს,ევროკავშირის საგარეო საქმეთა მინისტრები განიხილავენ რუსეთთან ურთიერთობას. მარტის ბოლოს კი, ევროკავშირის ლიდერებს მოუწევთ, რუსეთს ახალი სტრატეგია წარუდგინონ.
ახლა ვერავინ იტყვის, რომ ვინმემ მცდელობა დააკლო რამე გამოსულიყო. ახალი სანქციების გარდა, პუტინს ემუქრება უფრო შეკავშირებული ევროკავშირი, რომელსაც ადრე არ ჰქონდა ერთიანი მიდგომა მოსკოვის მიმართ.
ეს იქნება ცუდი რუსეთის ეკონომიკისთვის, მაგრამ არა კატასტროფა. ის კი არა, პუტინს სხვადასხვა უპირატესობას ეძლევა.
პირველ ყოვლისა, როგორც ექსპერტი რუსეთის საკითხებში, The spectator-ის ანალიტიკოსი მარკ გალვიტი წერს, ეს კლასიკური რუსული რეაქციაა. იმან, რომ ნავალნი გაბედულად დაბრუნდა რუსეთში და მამხილებელი ვიდეო გაუშვა ,,პუტინის სასახლის’’ შესახებ, აიძულა რეჟიმი რამდენიმე თავდაცვითი მანევრი განეხორციელებინა და იმხანად, დღის წესრიგს რუსეთის ხელისუფლება არ ქმნიდა. ახლა ის შეტევაზე გადავიდა, რომ დაანახოს რუსებს, რომ ნებას არ მისცემს ,,შეშფოთებულ’’ დასავლეთს რუსეთი შეაშინოს.
მეორე მხრივ, ეს საშუალებას აძლევს რუსეთის ხელმძღვანელობას, კიდევ ერთხელ მოყვეს ძველ ზღაპარს ალყაშემორტყმული ციხის შესახებ. ამ ვერსიით, რუსები უნდა გაერთიანდნენ, რათა არ მოექცნენ უცხო ძალების თათებში, როგორც ამას წერს ტატიანა სტანოვაია Tinancial Times – ში: თუ რიგითი რუსი მოქალაქე უსახსრობას უჩივის, ეს პუტინის კი არა, ბოროტი უცხოეთის ბრალია.
მესამე, და უმთავრესი – ახლა რეჟიმს ხელ-ფეხი აქვს გახსნილი შემოდგომისთვის დაგეგმილი გოსდუმის არჩევნების წინ, რომ დათრგუნოს ნებისმიერი წინააღმდეგობა, თუ არადა, მმართველ პარტია ,,ედინაია როსია’’-ს მოუწევს დაემშვიდობოს ძალაუფლებიდან ლომის წილს.
რუსეთის ხელისუფალთ არ სჭირდებათ თავის მოკატუნება, რომ თამაშობენ ძველი წესებით. უახლოესი 8 თვის განმავლობაში, ისინი დაემუქრებიან, დააკავებენ და ციხეში გამოამწყვდევენ ყველას,ვინც მათ წინააღმდეგობას გაუწევს. ეს არ ეხებათ მარტო პოლიტიკოსებს, გადასწვდებიან დამოუკიდებელ მედიასაც ( მან უკვე იგრძნო ეს საკუთარ ტყავზე). როგორც ბორელის ვიზიტმა აჩვენა, ასევე იქნება ნებისმიერი კრიტიკულად განწყობილი დიპლომატის გაძევებაც. ჯერ კიდევ დარჩა ბევრი რამ, რისი გაფუჭებაც შეიძლება.