Daily Express დიდი ბრიტანეთი
ოლივერ თრაფნელი
პუტინის აზრით, რიჩარდ მურს, რომელმაც პოსტი გასული წლის ოქტომბერში დაიკავა, არ ჰყოფნის გამოცდილება. მურზე შეტევის საბაბი გახდა მისი ,,თაიმს რადიოსთვის“ მიცემული ინტერვიუ, სადაც მან თქვა, რომ რუსეთი ,,ობიექტურად იმყოფება ეკონომიკური და დემოგრაფიული ვარდნის მდგომარეობაში’’
პრესკონფერენციაზე პასუხების გაცემის დროს პუტინმა განაცხადა: ,,ასეთი შეფასებები გააკეთა MI-6-ის ახალმა მეთაურმა. ის ხომ ახალბედა ხელმძღვანელია ამ თვალსაზრისით. ვფიქრობ, გამოცდილებას შეიძენს და აზრსაც შეიცვლის.’’
,,თუ რუსეთი მართლაც ჭკნობადი სახელმწიფოა, მაშინ რას დარდობენ?’’- იკითხა რუსეთის ლიდერმა და ლონდონს ურჩია ,,ჭკუით მოიქცეს’’ და არ გააფუჭოს რუსულ-ბრიტანული ურთიერთობები.
მან აღნიშნა ბოლოდროინდელი მკვეთრი ზრდა რუსეთ-ბრიტანეთს შორის ვაჭრობაში და დასძინა: ,,თუ თქვენ არ ჩაერევით, ყველაფერი კარგად იქნება.’’
საერთაშორისო ვაჭრობის სამინისტროს 14 მაისის მოხსენებით, ვაჭრობისა და მომსახურების საერთო მოცულობა ბრიტანეთსა და რუსეთს შორის, იმპორტ-ექსპორტის ჩათვლით, 2020 წლის განმავლობაში დაეცა დაახლოებით 1,7 მილიარდი ფუნტი სტერლინგით. გასული წლის ოთხი კვარტლის მონაცემებით, რუსეთი 21-ე ადგილზე იყო დიდი ბრიტანეთის პარტნიორთა სიაში და მასზე მოდიოდა ბრიტანეთის ვაჭრობის საერთო მოცულობის – 1,1%.
რუსეთთან ურთიერთობა 2018 წლის ქიმიური შეტევის შემდეგ დაიძაბა, როცა ორმა რუსმა აგენტმა, სცადა რუსეთის ყოფილი ჯაშუშის – სერგეი სკრიპალის მოწამვლა ,,ნოვიჩოკის’’ შხამით. ის ახლა MI-6-ში მუშაობს.
ახლახან საგარეო საქმეთა მინისტრმა დომინიკ რააბმა განსაცხადა, რომ რუსეთი მონაწილეობდა ბელორუსში Ryanaire-ის თვითმფრინავის გატაცებაში, როცა ჟურნალისტი და მისი მეგობარი გოგონა დააპატიმრეს.
რააბმა აღნიშნა, რომ „ძნელი დასაჯერებელია“ ეს მომხდარიყო „მოსკოვის, სულ ცოტა, თანხმობის გარეშე.“
მანამდე მურმა გააკრიტიკა კრემლი ქიმიური შეტევისთვის სოლსბერიში და უკრაინაში ქმედების გამო.
მან თქვა: „როცა ასეთ უგუნურ მოქმედების მოდელს ხედავ, ხედავ რა ხდება უკრაინაში – რა თქმა უნდა ეს გვაშფოთებს. სწორედ ამიტომ ვახდენთ ჩვენი მოქმედებების მჭიდრო კოორდინაციას მოკავშირეებთან, რათა დავრწმუნდეთ, რომ მკაცრ სიგნალს ვუგზავნით პრეზიდენტ პუტინს. მდგომარეობა მეტად რთულია.“
მურმა ასევე მკვეთრად გააკრიტიკა რუსეთის რეჟიმის კრიტიკოს ნავალნისადმი მოპყრობა, რომელსაც მთელ რუსეთში ათასობით დემონსტრანტი უჭერდა მხარს.
რუსეთმა პროტესტებს ათასობით კაცის დაკავებით უპასუხა, ხოლო მსოფლიომ კრემლი დაგმო სისასტიკისთვის.
მურმა პროტესტები პუტინის მიმართ უკმაყოფილების ზრდის ნიშნად მიიჩნია.